1 Shkurt 2026

Fshati Villnoss në veri të Italisë po vendos kufizime të reja për aksesin drejt kishës së famshme Santa Maddalena, pas rritjes së madhe të turistëve të nxitur nga Instagrami dhe TikToku. 

Nga muaji maj, vetëm banorët dhe vizitorët që qëndrojnë të paktën një natë do të lejohen të afrohen me makinë, ndërsa turistët ditorë do të duhet të ecin nga parkime të largëta. 

Autoritetet thonë se qëllimi nuk është ndalimi i turizmit, por menaxhimi i tij dhe ruajtja e qetësisë së komunitetit lokal.

Nga maji deri në nëntor, hyrja me makinë drejt zonës pranë kishës do të lejohet vetëm për banorët dhe turistët që qëndrojnë të paktën një natë.

Vizitorët ditorë do të duhet të ecin mbi 30 minuta nga parkime të largëta.

Autobusët turistikë dhe makinat e vizitorëve ditorë do të kthehen mbrapsht.

Çmimet e parkimit do të rriten për të dekurajuar vizitat për një fotografi të shpejtë.

Pse po ndodh kjo:

Mediat sociale e kanë kthyer zonën në magnet për “turistë që ikin me vrap”, selfie, foto dhe largim i shpejtë.

Këta vizitorë bllokojnë rrugët, ushtrojnë presion mbi infrastrukturën dhe kontribuojnë pak në ekonominë lokale. Vendasit thonë se situata është bërë e paqëndrueshme.

Kryetari i bashkisë thekson se nuk është kundër turizmit, por pro “turizmit të ngadaltë” – qëndrime më të gjata, më cilësore dhe më respektuese.

Masat shihen edhe si parandaluese, sidomos përballë rritjes së pritshme të fluksit nga Lojërat Olimpike Dimërore në Cortina.